Өвөрхангай : Хүйтний хөндий-Арвайхээр чиглэлийн 60 км авто замын шинэчлэлийн ажил үргэлжлэх гэж байгаатай холбогдуулан аймгаас ажлын баг томилж, гүйцэтгэгч болон зөвлөх компанийн төлөөлөлтэй уулзалт хийлээ. Аймгийн ЗДТГ, Цагдаагийн газар, Мэргэжлийн хяналтын газар, БОАЖГ, Авто тээврийн төвийн холбогдох мэргэжилтэн, улсын байцаагч нар авто замын өргөтгөлийн ажлыг гүйцэтгэж буй “HKB international holding” ХХК болон зөвлөхөөр ажиллаж байгаа "ICT Sain Consulting" ХХК-ийн хяналтын инженерүүдтэй уулзаж, санал солилцсон юм. Өнгөрөгч онд 21.4 км авто замыг асфальтбетон хучилтаар хучсан эвдрэл ихтэй байгаа тул эвдрэлийг засах, автозамын хучилтын ажлыг чанар, стандартыг хангаж гүйцэтгэхийг шаардлагыг тавилаа. Мөн Монгол Улсын хууль дүрмийг баримталж, байгалийн нөөц ашигласны төлбөрийг төлж барагдуулах, зам засварын шинэчлэлийн ажилд ашиглаж байгаа тээврийн хэрэгслийн бүрэн бүтэн байдал, замын хөдөлгөөний аюулгүй байдлыг хангах, Хөдөлмөрийн тухай хууль, хөдөлмөрийн аюулгүй байдлыг хангаж ажиллахыг шаардсан юм. Холбогдох байгууллагуудаас өгсөн шаардлагыг биелүүлээгүй тохиолдолд хяналт, шалгалтыг хэвлэл мэдээллийн байгууллагуудыг оролцуулан нэгдсэн байдлаар хамтарч хийхээ мэдэгдлээ.