Аялал жуулчлал ба чөлөөт бүсийн хөгжлийн асуудлаар Байгаль орчин, аялал жуулчлалын яам энэ сарын 19-ны өдөр зөвлөгөөн зохион байгуулсан.

Зөвлөгөөний үеэр Монголын эдийн засгийг сэргээх олон сайхан чухал төслийн илтгэлүүд тавигдсан юм.Тус яамны АЖБЗГ-ын дарга С.Бат-Эрдэнэ  “Монгол-Хятад-Орос” гурван улсын эдийн засгийн кордиорын дагуу хил дамнасан аялал жуулчлалыг хөгжүүлэх нь” сэдвээр онцолж илтгэл тавьсан.

Мөн Үндэсний аюулгүй байдлын зөвлөл, ажлын албаны референт Ё.Жаргалсайханы “Монгол-Хятад улсуудын хооронд байгуулах хил дамнасан эдийн засгийн чөлөөт бүсийг хөгжүүлэх нь”, Замын-Үүд чөлөөт бүсийн Захирагчийн ажлын албаны дарга И.Батнасаны “Замын-Үүд чөлөөт бүсийн өнөөгийн байдал, цаашдын чиг хандлага” болон Алтанбулаг чөлөөт бүсийн Захирагчийн ажлын албаны дарга Ж.Амаржаргалын “Алтанбулаг-чөлөөт бүсийн өнөөгийн байдал, цаашдын чиг хандлага”, Цагаан нуур-чөлөөт бүсийн Захирагчийн ажлын албаны дарга Ц.Итгэлийн “Цагаан нуур-чөлөөт бүсийн өнөөгийн байдал, цаашдын чиг хандлага”  зэрэг илтгэлүүд нь монголчуудын амьдралын түвшинг дээшлүүлж, улс орны эдийн засагт үнэтэй хувь нэмэр болох, гадаадын жуулчдад Монгол орон төдийгүй брэнд бүтээгдэхүүнүүдээ таниулах зорилготой юм байна.

Байгаль орчин, аялал жуулчлалын яамны АЖБЗГ-ын дарга С.Бат-эрдэнээс хил дамнасан аялал жуулчлалыг хөгжүүлэх гэж буй мастер төлөвлөгөөний талаар ярилцлаа. 

-Хил дамнасан чөлөөт бүсийг яаж хөгжүүлэхээр зорьж байна вэ?

-Хил дамнасан аялал жуулчлалыг хөгжүүлэхийн тулд чөлөөт бүсүүдэд олон хүмүүс, жуулчид ирэхийн төлөө хамтарч ажиллъя гэж зорьж байгаа юм. 2018 оноос эхлээд сайдын ажлын алба, чөлөөт бүсийн Захирагчийн ажлын албаны хүмүүстэй тодорхой ажлуудад хамтарч ажиллах саналыг тавилаа. Гурван улсын хооронд байгуулах хил дамнасан эдийн засгийн чөлөөт бүсэд аялал жуулчлалын бүтээн байгуулалт хийж, тодорхой судалгаа, мастер төлөвлөгөөтэй хөгжүүлэх шаардлагатай байгаа.

Гадаадын эрдэмтэн, судлаачидтай хамтарч аялал жуулчлалын мастер төлөвлөгөө хийх саналыг тавьсан. Мөн жуулчдын урсгалыг татахын тулд тодорхой эвентүүдийг чөлөөт бүсүүдэд зохион явуулж, хэрэгжүүлье гэж хэлэлцээд байна.

Бидний хувьд чөлөөт бүсийн аялал жуулчлалд гадаад, дотоодын жуулчид ирж, эвентүүдээ сонирхдог, худалдан авалт хийдэг, хооллож ундалдаг, аюулгүй орчинд аялж жуулчлах зэрэг эрх зүйн орчинг хангахад анхаарах юм. Бидний зүгээс олон жуулчдыг чөлөөт бүсэд хүлээн авахын төлөө бодлогоор зорьж, ажиллана. Тодорхой шийдвэрүүд судалгааны эцэст гарна.

-Мастер төлөвлөгөөг аль бүсүүдэд онцолж хэрэгжүүлэх юм бэ?

-Одоо манай улсад үндсэндээ гурван чөлөөт бүс байгаа. Харин Дорнодын хөдөө аж ахуйн чөлөөт бүсийг оруулаад дөрөв болж байгаа. Эдгээр дөрвөн бүсэд мастер төлөвлөгөөг зэрэг явуулъя гэж төлөвлөж байгаа юм. Баян-Өлгийн аймгийн Цагаан нуур, Алтанбулаг, Замын- Үүд чөлөөт бүсүүдэд Монголын түүх соёл, угсаатны зүйн онцлогийг тус тусад нь харуулсан дэлхийд танигдах үндэсний брэндүүдийг мастер төлөвлөгөөгөөр хэрэгжүүлнэ.

БНХАУ аялал жуулчлалын бүсдээ жуулчдын урсгалыг татсан, хотоо төлөвлөж хөгжүүлээд эхэлчихсэн байдаг. Гэхдээ бид мастер төлөвлөгөөг Засгийн газраар батлуулж, ажил болгож явуулах хэрэгцээ шаардлага бий гэж харж байгаа. Чөлөөт бүсүүдэд жишээ нь, бөө мөргөлийн зан үйлийг явуулвал дэлхийд танигдах брэнд гэж үзэж байгаа юм.

-Мастер төлөвлөгөөг санхүүжүүлэх төсөв мөнгө нь хаанаас гарах вэ. Олон улсын байгууллага, банкууд, эсвэл Засгийн газраас уу?

-Нэг чөлөөт бүсийг биш дөрвөн чөлөөт бүсээ зэрэг хөгжүүлэх учраас ямар гаргалгаагаар ямар улсын эрдэмтэн, судлаачидтай хамтарч цаашдаа мастер төлөвлөгөөг хэрэгжүүлэх талаар хэлэлцээд ажиллана.

-Тухайлбал, мастер төлөвлөгөөг ямар хугацаатай хэрэгжүүлнэ гэж төлөвлөж байгаа юм бэ?

-Эхлээд судалгааны ажил нэг, хоёр жил болно. Судалгааны ажил явагдаж дуусангуут хэрэгжилт хэд хэдэн шатлалтай явагдана.

Б.Баярмаа