ОХУ-ын ерөнхийлөгч Владимир Путин цаг барьдаггүй зангаараа алдартай.

Өчигдөр тэр Японд айлчлахдаа Ямагучи мужийн Убэ нисэх буудалд 17:00 цагийн үед буусан нь төлөвлөсөн цагаасаа гурван цагаар хоцорсон явдал байлаа. Ингэж саатсан нь ерөнхий сайд Шинзо Абэтай хийх уулзалтын хөтөлбөрийг хойшлуулж, оройн зоогийг нэлээд оройтоход хүргэсэн байна.

Ямагучи мужийн Нагато хотод эхлэх уулзалт товлосон хугацаанаасаа хоёр цаг хоцорч 18:00 цагт эхлээд орой 21:00 цагийн үед өндөрлөсөн юм.

Ер нь Путин дэлхийн улс орнуудын удирдагч нарыг хүлээлгэдэг зуршлаараа алдартай. Түүнийг хүлээж “хохирогсдын” жагсаалтад Германы канцлерь Ангела Меркель, АНУ-ын төрийн нарийн бичгийн дарга Жон Керри, Ромын Пап Франсис хүртэл багтдаг.

Ажиглагчдын үзэж байгаагаар Путин санаатайгаар хүнийг хүлээлгэж, сэтгэл зүйд нь дарамт үүсгэх тактиктай гэнэ. Бас ингэж хүлээлгэснээрээ өөрийн статусыг илүү өндөрт байгааг мэдрүүлэх бодлоготой гэж таамагладаг байна.

Энэ удаагийн уулзалтын бэлтгэлийг хангах зорилгоор арванхоёрдугаар сарын 2-нд Москвад айлчилсан Японы гадаад хэргийн сайд Фумио Кишидаг Путин хоёр цаг хүлээлгэж байжээ. Харин тэдний уулзалт ердөө 30 минут үргэлжлэх байсан юм.

Өнөөдөр Путины айлчлалын талаар мэдээлэл хийсэн сайд нарын танхимын нарийн бичгийн дарга Ёшихиде Суга айлчлалын саатлын цаана ямар нэгэн улс төрийн тоглолт байхгүй гэж үзэж байгаагаа сэтгүүлчдэд хэлжээ.

Гэвч Токиогийн зарим албаныхан хэлэхдээ Японы тал Путины энэ занг мэдэж байгаа тул цаана нь уулзалтад хангалттай цаг гаргаж болохуйцаар төлөвлөсөн гэсэн байна. Путиныг хүлээх зуураа Абэ цагийг ашиглан өөрийн эцэг Шинтаро Абэгийн бунханд очиж амжсан ажээ. Түүний эцэг 1980-аад оны үед гадаад хэргийн сайд байхдаа Зөвлөлт Холбоот Улстай газар нутгийн маргааныг шийдэж, энхийн гэрээг байгуулахаар ихэд чармайн ажиллаж байсан гэдэг.

Нагато бол Абэгийн удмынхны төрөлх хот юм.

Эх сурвалж: ikon.mn