Өнгөрсөн сарын 14-нд Хаити улсын Ле-Ке хотод болсон 7.2 магнитудын хүчтэй газар хөдлөлтийн улмаас амиа алдсан хүний тоо 2248-д хүрч нэмэгдлээ гэж тус улсын иргэний хамгаалалтын газраас мэдээлжээ. Өмнө нь 2207 хүн амиа алдсан гэж мэдээлж байв. Иргэний хамгаалалтын газраас мэдээлснээр, байгалийн гамшгийн улмаас 12 763 хүн гэмтэж бэртэж, 329 хүн сураггүйд тооцогдож байгаа бөгөөд 53 мянга гаруй байшин барилга бүрэн сүйдсэн бол 83 мянга гаруй байшин хэсэгчлэн нуржээ. Газар хөдлөлтийн голомт нь 125 мянга орчим хүн амтай Ле-Ке хотоос 40 км-ын зайд 10 км-ын гүнд байсан байна. Байгалийн гамшигт Өмнөд, Гранд-Анс, Нипп мужууд хамгийн их өртжээ. Байгалийн гамшигтай холбогдуулан Хаити улсын Засгийн газар нэг сарын хугацаатай онцгой байдал зарласан байна.