Парламентийн зарим гишүүд хулхи ухамсар гарган, УИХ-ын гишүүний бүрэн эрхээсээ татгалзан хууль хяналтын байгууллагаар шалгуулах уриалга гарган хэвлэлд хандах боллоо. Тэднийг ямар ёр нь хаашаа хөтөлснийг мэдэхгүй, энэхүү саналаа Ёс зүйн дэд хорооны дарга С.Бямбацогтод гардуулахаа дуулгаж дөвчигнөв. Одоогийн байдлаар 22 гишүүн бүрэн эрхээсээ түдгэлзэн, шалгуулахаар гарын үсгээ зурсан бололтой юм. Уг нь сайхан санаа аж. Гэвч хэвлэлд хандсан гишүүд нь МАН-ын бүлгийн даргаас буусан цухалдаа багтарч ядан яваа Д.Хаянхярваа болон МАНАН-гийн эрх ашгийг хамгаалагчид, өөрсдөө гэмт хэргийн үүр болсон гэхэд хэтийдэхгүй нөхөд байгаа нь итгэл үл төрүүлнэ. Нөгөө талаар “шударга үнэнч” царайлж байгаа нөхөд бол гомдогсод, горьдогчдын бүлэглэлийнхэн  байгаад хамаг учир оршино.

Гэхдээ яахав, нэгэнт парламент тэр чигээрээ бүрэн эрхээсээ түдгэлзэн шалгуулахаар болсон бол Ёс зүйн дэд хорооны даргын хувьд С.Бямбацогт эхлээд өөрөө концессоо шалгуулж, ёс зүйгээ ухамсарлахаас эхлэх хэрэгтэй. Шударга ёсыг Ёс зүйн дэд хорооны даргаасаа эхлүүлчих нь шударга байх. Энэ нөхөрт концессоос гадна Ховд аймагт будлиулсан олон асуудал, тендер байгааг орон нутгаас мэдээлж л байсан.

Тэгэхээр Засгийн газрын тэргүүнээр ажиллаж асан Ж.Эрдэнэбат сайд нартаа тарааж өгсөн концессоо, Д.Оюунхорол “Монгол, Кувейтийн хамтарсан судалгааны төв”-өөр дамжуулж угаасан 1.2 сая ам.долларын хэргээ, Н.Номтойбаяр “Цагаан суварга”-ын ордыг болон 36 лиценз яаж авснаа, хамгийн наад зах нь хүний аминд хүрсэн, хүчингийн, зодооны гэх мэт маргаанаа шийдвэрлүүлж нэг талд нь гарга л даа. Үүнээс гадна Ж.Мөнхбатын хувьд гурван тэрбумын өртөгтэй хаус, 500 сая төгрөгийн үнэтэй автомашин, 60 тэрбумын үл хөдлөх хөрөнгө гээд олон зүйлийн эх үүсвэрийг тайлбарлаж нэг талдаа гаргах цаг нь болсон. Суудалдаа үлдэх гэж үхэн хатан тэмцэж байгаа УИХ-ын дарга М.Энхболд ч “60 тэрбум”-ын асуудлаа цэгцлэх цаг нь болсон. Прокуророос “60 тэрбум”-ын бичлэг бол эвлүүлэг биш бодит зүйл гэдгийг ч мэдээлчихлээ. Энэ мэт олон маргаан дагуулсан асуудлаа шийдэж нэг талдаа гаргах цаг яах аргагүй болжээ. Тиймээс нөхөд өөрөө өөрсдийгөө шалгуулъя гэж байгаа дээр нь шалгаад өгөх хэрэгтэй.

Хэвлэлд хандсан гарын үсэг зурагчдын хувьд ЖДҮ-ийг хөгжүүлэх сангаас зээл авсан гишүүдийг бүрэн эрхээсээ татгалзан шалгуулахыг шаардсан. Энэ сангаас зээл авсан гишүүд ч хууль хяналтын байгууллагаар шалгуулаад зээл аваагүй бол нэрээ цэвэрлэх, үнэхээр авчихсан бол хариуцлагаа хүлээгээд явахад юу нь болохгүй байгаа юм. Өнөөдөр хэвлэл мэдээллийн хэрэгслээр ЖДҮ-ийг хөгжүүлэх сангаас зээл авсан гишүүдийн нэрс баримттай явж байгаагаас харвал шалгах нь зүй ёсны хэрэг. Гагцхүү хууль хяналтын байгууллага аль аль маргааныг шүүн хэлэлцэхдээ улс төрийн зорилгоор бус, хэн нэгний захиалгагүйгээр, ганц нэгэн хүнийг онцлохгүйгээр шударга шүүх нь чухал.

С.Баяр

Эх Сурвалж http://factnews.mn/n1b