Өндөр настангууд их мэдрэмтгий болж, яг л жаахан хүүхэд шиг амархан баярлаж гомддог болчихдог билээ. Тэд заримдаа залуу үеийнх шигээ мэдрэмж авахыг хүсэх хэдий ч хэн нэгэнд хэлэхээс санаа зовох нь элбэг.

Тэгвэл ганцаардсан настай хөгшинд баяр баясал, инээмсэглэл бэлэглэх тийм ч хэцүү бус. Тэдний зүрх сэтгэлд хүрэх түлхүүрийг олох нь чухал.

Брендалин Мэй Портер бол өндөр настангуудын асрамжийн газарт сувилагч хийдэг аж. Тэндхийн олон хөгшид их даруухан бөгөөд барагтай бол хүмүүсээс тусламж хүсээд байдаггүй гэнэ. Бүр зайлшгүй тохиолдолд л бусдыг гуйна.

Саяхан тус асрамжийн газарт ирсэн настай эмээ нэгэн удаа Брендалиныг хумс аваад өгөөч хэмээн гуйжээ. Ингээд сувилагч бүсгүй эмээгийн хумсыг тайрч өгсний дараа түүний хумсыг лакдаж өгөхийг хүстэл эмээ эрс эсэргүүцсэн байна.

 Энэ тухай сувилагч бүсгүй өөрийн олон нийтийн сүлжээ хуудсанд өгүүлжээ:

“Өнөөдөр би ажил дээрээ нэгэн эмээгийн хумсыг лакаар будаж өгөхийг хүсэхэд тэрээр эрс дургүйцлээ. Эмээ гараа харснаа: “Миний гар муухай учраас би түүнийг олны анхааралд өртүүлмээргүй байна” гэсэн юм. Мэдээж, тэр их өндөр настай тул гар нь толботон цоохортож, арьс нь үрчлээтэн хуниралдсан байсан. Гэвч би түүнийг тунгалаг өнгийн лакаар хумсаа будуулчихаасай гэж маш ихээр хүсч байсан тул түүнд хандан: “Таны гар харин ч маш сайхан шүү дээ. Энэ хоёр гар таны амьдралын түүхийг хүүрнэж байна. Тэд таны амьдралд тохиолдож байсан гайхалтай сайхан мөчүүд, хайр сэтгэл, халамж энхрийлэл, адал явдлуудын тухай ярьж байна. Энэ хоёр гар хайртай хүмүүсээ илж таалдаг байсан, одоо ч гэсэн олон хүмүүс энэ хоёр сайхан гараар дахин илүүлэх юмсан гэж хичнээн их хүсч байгаа бол оо” гэж хэллээ.

Сувилагч бүсгүйн халуун дулаахан үгс эмээгийн сэтгэлийн утсыг хөндөн, уярааж чаджээ. Ингээд тэд харилцан ойлголцолд хүрч, хоёулаа ягаан өнгийн хумсны лакийг сонгон авсан гэнэ.

 Бүсгүйн энэхүү нийтлэл олон хэрэглэгчдийн сэтгэл зүрхэнд хүрч, тэд зарим хайртай ахмад хүмүүсийнхээ гарын зургийг постолсон байна.  

Эх сурвалж.www.free.zone.mn