Завханы бизнесийн байгууллагууд нийгмийн хариуцлагынхаа хүрээнд бүтээгдэхүүн үйлчилгээгээ  хүүхэд, залуучуудын эрхэд нийцүүлэн ажиллахаар болжээ. Тухайлбал “Хүүхдэд ээлтэй орон нутаг” хөтөлбөрийн хүрээнд “Хүүхдэд ээлтэй бизнес” сургалт, семинарыг Улиастайд  зохион байгууллаа.
Бизнесийн байгууллагууд бүтээгдэхүүн үйлчилгээ, нийгэмд хандсан үйл ажиллагаандаа хүүхэд, залуучуудын эрх, тэдний хэрэгцээг оновчтой уялдуулснаар бизнесийнхээ тогтвортой өсөлтийг тууштай дэмжиж чаддаг байна. Энэ нь ихэвчлэн энгийн бөгөөд бага хөрөнгө оруулалт шаарддаг ч үр дүн өндөр байдаг тухай энэхүү суртгалтаар онцлон ярилцжээ.  Сургалтанд 40 орчим бизнесийн байгууллагын төлөөлөл хамрагдсан байна. Энэ үеэр хүүхдийн суурь эрх, хэрэгцээ, тэдгээртэй холбоотой бизнесийн зарчим, олон улсын аргачлалыг бизнестээ хэрхэн үр дүнтэй ашиглах, хүүхдэд үзүүлэх сөрөг нөлөөллийн эрсдлээ бууруулснаар байгууллагад учрах сөрөг үр дагавруудаас хэрхэн урьдчилан сэргийлэх, хамгаалах, НҮБ-ын Хүүхдийн сангийн “Хүүхдийн эрх ба бизнесийн зарчим” аргачлал болон бусад арга техникүүдийн тусламжтайгаар шаардлагатай алхмуудыг яаж  хийх талаарх мэдлэг, мэдээллийг оролцогчид авсан байна.
Завхан аймгийн ЗДТГ хүүхдийн эрхийг хамгаалах, хүүхэд хамгааллыг сайжруулах зорилгоор Нэгдсэн Үндэсний Байгууллагын Хүүхдийн сантай хамтран “Хүүхдэд ээлтэй орон нутаг” хөтөлбөрийг 2017 оноос эхлэн хэрэгжүүлж байна. Завхан аймгийн 72.1 мянган хүн амын гуравны нэгийг эзэлж байгаа 0-18 насны хүүхдүүдийн эрүүл, аюулгүй амьдрах эрх, хөгжих эрх, хамгаалуулах эрх, нийгмийн амьдралд оролцох эрхийг хангахад салбар дундын зохицуулалтыг хангах, хүүхэд хамгааллын тогтолцоог бий болгоход энэ хөтөлбөрийн  зорилго оршиж байгаа юм. Хөтөлбөрийг үр дүнтэй хэрэгжүүлэх, хүүхдэд ээлтэй аймаг болоход төрийн болон төрийн бус байгууллага, аж ахуйн нэгж, иргэн бүрийн үүрэг оролцоо, идэвх санаачилга чухал. Тиймээс аймгийн ЗДТГ-аас  “Хүүхдэд ээлтэй бизнес” сургалт, семинарыг зохион байгуулсан тухай аймгийн ЗДТГ-аас мэдээлэв.

Б.Мягмарсүрэн