Монгол Улсын БОАЖ-ын сайдын тушаалаар улс даяар өрнөж буй байгаль орчны салбарын Нээлттэй хаалганы өдөрлөг Сүхбаатар аймагт хоёр дахь өдрөө үргэлжилж байна. Энэ үеэр байгаль орчны салбарын албан байгууллагууд өөрсдийн үйл ажиллагааг иргэдэд танилцуулж, мөн иргэдээс сэтгэл ханамжийн судалгаа авч байна.

Энэ сарын 21-23-ны өдөр тохиох дэлхийн ойр, ус, цаг уурын өдрүүдийг угтаж дээрх Нээлттэй хаалганы өдөрлөг болж байгаа юм.

Өдөрлөгт Мэнэнгийн тал, Буйр нуур сав газрын захиргааны мэргэжилтнүүд оролцжээ. Тус газар нь усны тухай хуулийн хэрэгжилтийн биелэлтэнд хяналт тавьж, ус ашиглагч ААНБ-уудад 50-100 шоо метр газарт ус ашиглах зөвшөөрөл олгож, гэрээ байгуулан ажилладаг байна. Үүнийхээ хүрээнд 2017 онд аймаг орон нутгийгн төсөвт 1,5 тэрбум төгрөгийг төвлөрүүлсэн гэх мэдээллийг мэргэжилтэн Э.Болорчимэг өглөө.
Аймгийн Ус, цаг уур, орчны шинжилгээний газар /УЦУОШГ/-аас агаарын бохирдлын хэм хэмжээ, хаваржилтын нөхцөл байдал, цаг агаарт зориудаар нөлөөлөх ажлын бэлтгэлийн талаар иргэдэд мэдээлэл өгч байгаа. Ойрын өдрүүдэд салхигүй тогтуухан байгаатай холбоотой өглөө оройдоо их утаатай байгаа. Гэхдээ энэ нь хүлцэл агууламжийн хэмжээнээс давсан зүйл байхгүй, хүний эрүүл мэндэд хортой сөрөг нөлөөгүй гэв. Харин одоогоор бүх нутгаар хаваржилт хэвийн байгаа, цас ихтэй өвөл байсан учир гуу жалгаар шар усны үер үүсэх тохиолдол ажиглагдаж эхэлжээ. Агаарын температурын хувьд энэ сарын сүүлээр +15 градус хүрч дулаарна гэлээ.
Өдөрлөгт аймгийн Байгаль орчин аялал жуулчлалын газар, “Сүхбаатар ойжуулалт” сум дундын ойн анги,
Сүхбаатар тохижилт ОНӨҮГ, Дарьгангын байгалийн цогцолброт газрын сав газрын захиргаа, УЦУОШГ, Мэнэнгийн тал, Буйр нуур сав газрын захиргаа Гуравдугаар БДС-ийн Эко элч клубууд оролцов.
Сүхбаатар аймаг нь нутаг дэвсгэр, хил хязгаарынхаа хувьд дөрвөн сав газрын захиргаанд харьяалагддаг юм.