“Гэр хороолол” хөдөлгөөнөөс “Гэр хорооллын иргэдийн III чуулган”, “Эсэргүүцэж байна” жагсаал хийх талаараа "Үндэсний мэдээллийн төвд" мэдээлэл хийлээ.

Тэд хотын шинэ удирдлагууд гэр хорооллын дахин төлөвлөлтийг гацааж, хотын захиргааг Нүхт рүү нүүлгэх шийдвэр гаргасан нь дарга нар өөрсдийнхөө эрх ашигт нийцүүлж буй хэрэг юм. Үнэндээ тэд шинээр барилга, орон сууц барьж бизнесээ цэцэглүүлэх менежмент хийхийн тулд дээрх шийдвэрийг гаргаж байна хэмээв. Тиймээс гэр хорооллын иргэд нэгдэн энэ сарын 9- нд СТӨ-нд “Гэр хорооллын иргэдийн III чуулганаа” хийж, Сүхбаатарын талбайд “Эсэргүүцэж байна” жагсаал өрнүүлнэ гэдгээ мэдэгдэв.

"Гэр хороолол" хөдөлгөөний тэргүүн Б.Батсүх хэлэхдээ, “Бат-Үүл даргын үед хотын захиргаа гэр хорооллын иргэдийн газрыг орон сууцаар солих хэлбэрээр дахин төлөвлөлтийг хийж байсан. Гэтэл одоогийн удирдлагууд ажлаа авснаас хойш дахин төлөвлөлтийн ажлыг зогсоож иргэдийн эрүүл аюулгүй орчинд амьдрах эрхийг нь эдлүүлэхгүйгээр зогсохгүй бусдын өмч хөрөнгийг хуурамчаар үнэлж захиргааны аргаар хашааны газрыг нь дээрэмдэх үйл ажиллагааг явуулж байна. Үүний нэгэн тод жишээ нь өнөөдөр С.Батболд дарга хашааны газрыг орон сууцны урьдчилгаа 30 хувь болгож, ам.метрийг 60 мянган төгрөгөөр үнэлж дээрэм хийж байна. Өмнө нь иргэдийн хашааны газрыг 2-6 өрөө байраар сольж, ажлын байраар хангадаг байсан. Тиймээс тэдний хийж буй энэ ажлыг зогсоохын тул бид тэмцэж, эсэргүүцэхээс өөр арга алга. 2012-2016 онд Улаанбаатар хотын захиргааг Сонгинохайрхан дүүрэг рүү шилжүүлэх шийдвэр гаргасан байдаг. Гэтэл С.Батболд дарга Нүхтийн аманд, зуслангийн хажууд хотын захиргааг нүүлгэх шийдвэр гаргав. Энэ нь эрх мэдэлтнүүд Яармагийн өмнөх хэсгийн газрыг авч, тэндээ бизнес хийх гэж байгаа санаа гэж бид дүгнэж байна. Дарга нарын энэ увайгүй үйлдлийг газрын эзэд бид нийлж зогсоох хэрэгтэй. Тэд гэр хорооллын иргэдийн газрыг ийнхүү үнэ цэнэгүй болгож болохгүй” гэв.
О.Мөнхжаргал