Сургуулиа төгсөөд ажлын байрандаа нэг их “акцент өгөөгүй” явж байтал SBN телевизийн Батзаяа кинонд дуу оруулах сонирхол байвал шалгуулаарай гэсэн саналыг тавьжээ. Энэхүү саналын дагуу тэрбээр шалгуулж, хоёр жил гаруй SBN телевизэд ажилласан байна. 2010 онд тус телевизийн уран бүтээл “Сонголт” олон ангит УСК-д тоглож байсан. Тухайн үеийн дүр төрхийг нь одоогийнхтой нь харьцуулан харахул их л махлаг.

Ажлын гараагаа телевизийн салбараас эхэлсэн бүсгүй 2012 онд УДЭТ-т жүжигчний сонгон шалгаруулалтанд орж тэнцэн 2014 оноос жинхлэн ажиллаж буй. УДЭТ-т ажиллах хугацаандаа Мигел де Сервантесийн “Дон Кихот” жүжгийн Мариторнесийн дүрд тоглосон бөгөөд 2013 оны шилдэг дүрийн уралдаанд Хенрик Ибсений “Хүүхэлдэйн байшин” жүжгийн Нора, Михайл Себастяны “Нэргүй од” жүжгийн Монагийн дүрээр оролцож 3 дугаар байр эзэлсэн. Н.Баярмаа Пусаны наадмын тэргүүн байрт шалгарсан “АЛСЫН УДИРДЛАГА” киноны гол дүр болох Ануг амилуулсан билээ.

МУГЖ Г.Уранчимэгийн шавь тэрээр ахмад үеэс Ардын жүжигчин Д.Мэндбаяр гуайг шүтэж биширдэг. Мөн театрынхаа ахмад үеийн төлөөлөл Ардын жүжигчин П.Цэрэндагва, Г.Мягмарнаран, дунд үеийн төлөөлөл Г.Эрдэнэбилэг С.Болд-Эрдэнэ олон чадварлаг жүжигчдийг хүндэлж явдаг.

Н.Баярмаа өнгөрөгч 7-р сарын эхээр Нүхтэд чимээ анир багатай хуримаа хийснийг нь олон хүн мэдээгүй өнгөрсөн байх. Хуриманд уригдан ирсэн зочдодоо охинтойгоо дуулсан дуугаар бэлэг барьсныг доорх бичлэгээс тольдоорой!

э

Жүжигчин бүсгүй ганцаардахаас маш их айдаг гэнэ. Тиймээс “Хамгийн том айдас бол ганцаардал. Өөрөө мэдэрч байгаагүй ч ганцаардал сүйрэл шиг санагддаг. Бодит айдас гэвэл харанхуй, гүнзгий нүх” хэмээн хэлсэн байна. 

Тоглосон дүр бүрээ амжилттай болдоггүй гэж боддог тэрээр өөрөө өөрийгөө нэлээд зовоож ажилладаг хүн. Ямартаа л “Жаргаагүй нар” жүжгийн Д.Пагмадуламын дүрд сургуулилах үеэр их өндөр ачаалалтай ажиллаж стресст оржээ. “Өдөржин бэлтгэл хийж амьдаар их чанга ярьдаг, нээлтийн өмнө миний хоолой суугаад бүр хяхраад баларсан. Мэдрэлийн гаралтай хоолойны булчин сулрал болсон байсан. Эмчилгээ хийлгэсэн ч одоо болтол хоолойгоо сайн сэргээж чадаагүй л байна. Үнэхээр их хөдөлмөрлөж үр дүн нь гарсан, гэхдээ хөдөлмөрлөж болно, их ухаантай хөдөлмөрлөх ёстой юм байна лээ, хар хүчээр зүтгээд дэмий гэдгийг хатуу ойлгосон” хэмээн ярьсан байдаг.

Жүжигчний ид оргил үе дээрээ яваа бүсгүй энэ л цаг мөчийг олон тийш нь самгардаж аль ч үгүй болгож орхихгүй гэсэндээ зөвхөн мэргэжилдээ шамдаж буй.

Харин яваандаа хүмүүнлэгийн ажил, хүүхдүүдэд чиглэсэн гэгээн зүйл хийхсэн гэж их мөрөөддөг. Нэг хүүхдийг ч гэсэн эрүүл, жаргалтай байлгачих юмсан хүсэх нь өрөвч хүний зан.

Хүнтэй хэрэлдэж муудалцаж үзээгүй Н.Баярмаа өөртөө бол тунчиг хатуу, өндөр шаардлага тавьдаг. Эрүүл амьдралын хэв маягт дуртай тэрбээр цаг л гарвал хөдөлгөөн хийдэг. Нэг хэсэг балетаар хичээллэсэн, уян хатан байдлаа алдахгүйн тулд хааяа иог хийнэ. Мөн усанд сэлдэг гэнэ.

Мэргэжлийн ур чадвар сайтай сайхан бүсгүйд киноны санал их ирдэг. Дэлгэцийн бүтээлд тэрээр хоёр ч удаа нууц амрагийн дүрд (“Сүүлчийн шөнө”, “Хайр эргэсэн хавар” ОАК) тоглоод авсан юм.

Нүцгэн зургийхаа тухайд Баярмаа “Гурван жилийн өмнө “Сүүлчийн шөнө” кинонд тоглож байхад УДЭТ-тай сэтгүүлийн газар хамтарч ажиллаад нэг жүжигчнээ өгөөч гэхээр намайг өгсөн юм байна лээ.  Азаар тэр үед нэг их шуугиагүй чимээгүй өнгөрсөн. Би гэртээ бүр далд хийчихсэн. Хааяа юмаа янзалж байхад гараад ирдэг, харахаар халуун оргидог. Нөхөр маань тухайн үед  нэг их тоогоогүй, ганц удаа шүү дахиад ийм юм байхгүй шүү гэсэн. Харин дүрийн хувьд маш гоё кинонд миний дүр өөрөө их гоё дүр байгаад, дүр дээр маань тийм шаардлага гарах юм бол нэг удаа байж болох юм” хэмээн ярилцлагадаа өгүүлсэн юм.

У.Маргад
Эх сурвалж: Leaders.mn