Өнгөрөгч мягмар гариг буюу наймдугаар сарын 30-ны өдөр Хөсвгөл далайд дөрвөн хүүхэд, нэг том хүн завьтайгаа хөмөрч амь эрсэдсэн харамсалтай хэрэг гарсан. Хөвсгөл аймгийн Онцгой байдлын албанд тухайн өдрийн 14:00 цагийн орчимд Хатгал тосгоны Жанхайн даваанд байрлах “Арцарам” амралтын газрын ойролцоо нууранд завьтай хүмүүс усанд живсэн гэх дуудлага иржээ.

СЭРЭМЖЛҮҮЛЭГ: Завь огцом эргэлт хийсний улмаас осолджээ

Өнгөрөгч мягмар гариг буюу наймдугаар сарын 30-ны өдөр Хөсвгөл далайд дөрвөн хүүхэд, нэг том хүн завьтайгаа хөмөрч амь эрсэдсэн харамсалтай хэрэг гарсан. Хөвсгөл аймгийн Онцгой байдлын албанд тухайн өдрийн 14:00 цагийн орчимд Хатгал тосгоны Жанхайн даваанд байрлах “Арцарам” амралтын газрын ойролцоо нууранд завьтай хүмүүс усанд живсэн гэх дуудлага иржээ.

Улмаар аймгийн онцгой байдлын албанаас эрэн хайх ажиллагаа явуулж 6 настай эрэгтэй О, 8 настай эрэгтэй Б, 11 настай эрэгтэй О, 26 настай эрэгтэй Н нарыг завьтайгаа хөмөрч осолдсон байсныг олж цогцсуудыг гарган тус аймгийн Цагдаагийн газрын жижүүрийн бүрэлдэхүүнд хүлээлгэн өгсөн байна. Уг завин дээр хамт явсан 15 настай эрэгтэй Б-г олоогүй тул эрэн хайх ажиллагааг үргэлжлүүлэн  явуулж, осол болсны маргааш өдөр буюу өчигдөр 11:30 цагийн орчимд цогцсыг уснаас гаргаж авсан хэмээн Хөвсгөл аймгийн Онцгой байдлын албаны ахлах дэслэгч Н.Мягмарсүрэн мэдээлсэн юм. Одоогоор амь эрсэдсэн иргэдийн сууж явсан завийг олоогүй байгаа бөгөөд уг завь өмнө нь жуулчны зориулалтаар ашигладаг байсан хувийн завь байсан гэх мэдээлэл байна.

-ХОРМЫН ДОТОР ЗАВЬ ХӨМӨРЧ ХҮҮХДҮҮД ТУСЛАМЖ ДУУДАН ХАШГИРЧ БАЙЖЭЭ-

Ослын хэргийг шалгах явцад, завийг жолоодож явсан 26 настай эрэгтэй Н нь завь жолоодох эрх аваагүй байсан нь тогтоогдсон бөгөөд жолоодож явсан завь нь улсын бүртгэлд бүртгэгдээгүй завь байжээ. Түүнчлэн уг завин дээр сууж явсан хүмүүс бүгд аврах хантааз өмсөөгүй байсан аж. Хүүхдүүд Хатгал тосгон болон Мөрөн сумын 3-р багаас өвөө эмээтэйгээ далай үзэхээр ирээд байжээ. Эх сурвалжийн мэдээллэж буйгаар тэд Хөвсгөл аймгийн Хатгал тосгон болон Мөрөн сумын харьяат бөгөөд ах дүүсийн хүүхдүүд байсан аж. Мөн уг завин дээр нэг айлын хоёр хүүхэд байсан ба завь жолоодож явсан эрэгтэй, хүүхдүүдийн авга ах байсан гэх мэдээлэл байна.

Нас барсан хүмүүс наймдугаар сарын 30-ны өдрийн үдийн 12:00 цагийн орчимд далайд гарсан бөгөөд эргээс 800 метр зайд осолдсон аж. Завь далайд гарснаас хойш тогтмол бага хурдтай явсан гэх боловч, огцом эргэлт хийсний улмаас усанд нэг хүүхэд унасан байна. Түүний дараа хормын дотор завь хөмөрч хүүхдүүд тусламж дуудан хашгирч байжээ. Улмаар осол болсон газрын харалдаа байрлах жуулчны баазын ажилтан аймгийн Онцгой байдалд дуудлага өгснөөр аврах албаны бүрэлдэхүүн цаг алдалгүй ирсэн боловч хүүхдүүдийн амь насыг аврах боломжгүй болсон байжээ.

Хөвсгөлд далайд зуны улиралд аюулгүй байдлыг хангах эргүүл постууд ажиллуулдаг боловч аялал зугаалгын улирал дууссан тул наймдугаар сарын 21-ний өдөр Далайн захиргаанаас Хөвсгөл нууранд завь жолоодох үйл ажиллагаа явуулдаг иргэдийн дунд хаалтын үйл ажиллагааг зохион байгуулсан байна. Улмаар наймдугаар сарын 22-ы өдөр Сүхбаатар онгоцны бүрэлдэхүүн аялал жуулчлалын үйл ажиллагаагаа зогсоосон тул Хөвсгөл аймгийн Онцгой байдлын газар Хөвсгөл нуурт аюулгүй байдал ханган ажиллаж байсан эргүүлийн постыг буулгаад байжээ.

Хэргийн талаар тус аймгийн Засаг дарга Б.Ганболд

“Хөвсгөл нуурт таван иргэн завьтайгаа осолдож нас барсан явдалд гүнээ харамсаж байна. Далайн эргүүлийг наймдугаар сарын 29-ны өдөр буулгаснаас нэг хоногийн дараа харамсалтай үйл явдал боллоо. Уг нь далайн эргүүл буусан энэ үед далайд гарахыг хориглодог хэдий ч манай иргэд тоохгүй байсаар ийм байдалд хүрлээ. Тиймээс цаашдаа хаа хаанаа анхаарал болгоомжтой байх хэрэгтэй гэдгийг сануулж байна. Осолдсон завь нь тухай иргэний хувийн завь байсан. Өмнө нь жуулчны баазад ашиглаж байсан завийг худалдаж авсан байсан юм билээ. Харин уг завь улсын бүртгэлд байгаагүйн дээр жолоодож явсан иргэн завь жолоодох эрхгүй байсан. Одоо хэргийг цагдаагийн газарт шалгаж байна” гэлээ.

Б.ЦОГ