Засгийн газраас 2,5 сая төгрөгөөс дээш цалинтай иргэпээс авах Хувь хүний орлогын албан татварыг 25 хувьд хүргэхээр санал гаргасан. Нийгмийн даатгалын шимтгэл төлдөг 900 мянган иргэний 1,2 хувь нь сарын 2,5 сая төгрөгөөс дээш орлоготой гэсэн судалгаа бий. Тэгвэл ийм хэмжээний цалинтай хүмүүсийн дийлэнх нь хөдөлмөрийн хүнд нөхцөлд ажилладаг уурхайчид гэсэн шүүмжлэл сүүлийн үед их явж буй. Монголын эрчим хүч, геологи уул уурхайн үйлдвэрчний холбоод ч Засгийн газрын санал болгосон хуулийн өөрчлөлтөд хамгийн их өртөх хүмүүс бол уурхайчид гэж үзэж байна. УИХ-ын зарим гишүүд ч байнгын хорооны хурлаар энэ хуулийн өөрчлөлтөд өртөх хүмүүс нь уурхайчид биш үү хэмээн болгоомжилж, одоогоор татвар нэмэх хуулийн төслүүдийг бөөнд нь дэмжихгүй гэдэг шийдвэрт хүрээд байгаа.

Өвөл зунгүй, өдөр шөнөгүй илүү цагаар ажиллаж олсон цалингаа хасуулах дургүй байгаагаа мэдэгдсэнээс гаднатэтгэвэр тогтоох насыг үечлэн нэмэх  Сангийн сайдын саналыг мөн л эсэргүүцэж байгаагаа илэрхийллээ. Тэд үүн дээр “Эрчим хүч уул уурхайн салбарт хөдөлмөрийн хортой нөхцөлд ажилладаг 30 мянган уурхайчин, инженер тэтгэврээ тогтоолгож чадалгүй хорвоог орхивол яах вэ” гэсэн асуултыг эрх баригчдад тавьж байна.