Монгол Улсын их дээд сургуулиудын захирлаар ялсан намын талын нөхдийг томилдог нь бараг л хэвшил болсон үйлдэл. Ингэхдээ удирдах чадвар энээ тэрээг харж үзнэ гэдэг бараг л худлаа. Үүний нэг тод жишээ нь МУБИС-ийн захирал Д.Мөнхжаргал юм.

Түүнийг Ардчилсан нам эрх барьж байхдаа томилсон. Өнгөрсөн хугацаанд харьяа яамнаас нь тус сургуульд удаа дараагийн шалгалт оруулж олон төрлийн онц ноцтой зөрчил илрүүлсэн ч өмнөх сайд Ж.Батсуурь толгойг нь илээд л байлаа. Учир нь тэрээр нам дамжсан урваач, шарваач гэдгийг ойр тойрных нь хэлдэг юм билээ. МУБИС-ийг энэ жил 2000 оюутан төгсөж, улсынхаа боловсролын салбарт гар бие оролцоно. Гэвч Д.Мөнхжаргал захирлын балагаар тэдний хүсэл мөрөөдөл талаар өнгөрч болзошгүй нь. Учир нь эдгээр төгсөх оюутнуудын дипломын хавтасыг өмнөд хөршид захиалан хэвлүүлсэн бөгөөд эдгээр нь алдаатай хэвлэгдсэн байна. Ингээд зогссонгүй өнөөх дипломын үнэт цааснууд усанд норж, бичиг нь баларч, үрчийж хорчийжээ. Эрдийн баяраа тэмдэглэн 4 жилийн хугацаанд юу сурч мэдсэнээрээ бахархан хүний өөдөөс сарвайх юмтай болж ажлын байранд итгэл төгс гарна гэж итгэсэн оюутнуудын хүсэл талаар болох нь. Зурагт үзүүлснээр МУБИС-ийн шалаар дүүрэн усанд норсон дипломуудаа хатааж байгаа нь энэ. Эдгээрийг хэвлүүлэхийн тулд нэг оюутнаас 25000 төгрөг татаж, нийтдээ 50 гаруй сая төгрөг зарлагадсан байна. Уг нь бол сургуулийн дипломын хэвлэлтийг өөрийн улсдаа хэвлүүлэх дүрэм журамтай ч Д.Мөнхжаргал захирлын шуналаас үүдэн ийм байдалтай болжээ.

Тиймээс БСШУС-ийн шинэ сайд Г.Чулуунбаатар та энэ мэт хэрэггүй захирлуудад яаралтай арга хэмжээ авч, дээрх асуудлыг нэн даруй шийдвэрлэн амьдралаараа хохироход хүрсэн залуусын хүсэл мөрөөдөлд гэрэл нэмэх хэрэгтэй байна.