Аймгуудын өрсөлдөх чадварын тайланг “Эдийн Засгийн бодлого, Өрсөлдөх чадварын судалгааны төв”-өөс гаргасан талаараа өнөөдөр /2017.05.11/ мэдээлэл хийлээ.

Тус хуралд Эдийн Засгийн бодлого, Өрсөлдөх чадварын судалгааны төвийн захирал Б.Лакшми, ХБНГУ-ын олон улсын хамтын ажиллагааны нийгэмлэгийн эрдэс, баялаг түүхий эдийн ерөнхий захирал Др.Штефан Ханселманн нар оролцсон юм.

Эдийн Засгийн бодлого өрсөлдөх чадварын судалгааны төвөөс “Аймгуудын өрсөлдөх чадварын тайлан”-г 2012 оноос эхлэн тав дахь жилдээ гаргаж байгаа юм байна.

Аймгуудын өрсөлдөх чадвараар энэ жил Орхон аймаг тэргүүлсэн бол удаах байранд Говь-Алтай аймаг орсон байна. Өрсөлдөх чадварын шинжилгээг 180 үзүүлэлтээр хэмждэг аж. Сүүлийн таван жилд Орхон, Дархан-Уул, Өмнөговь, Сүхбаатар зэрэг аймгуудын өрсөлдөх чадварын оноо харьцангуй өндөрт тооцогдож эрэмбээ алдахгүй үргэлжлүүлсээр байгаа юм байна.

Энэ жил Дорноговь аймгийн хувьд засаглал болон дэд бүтцийн үзүүлэлтүүд, Өвөрхангай аймгийн хувьд эдийн засаг өссөн үзүүлэлттэй байна.

Дашрамд дуулгахад аймгуудын өрсөлдөх чадварыг тодорхойлоход ашигласан 180 гаруй үзүүлэлтүүдийн талаарх дэлгэрэнгүй мэдээллийг www.aimagindex.mn вэб сайтаас харах боломжтой аж.

Н.Мичидмаа