НУ-ын “Фэйсбүүк” компани үзэн ядсан агуулгатай болон бусдад муу үлгэр дууриал үзүүлэхээр үг хэллэг ба дүрс бичлэг цацагдаж буйг таслан зогсоож, хүүхдийн эсрэг хүчирхийлэлтэй тэмцэхийн тулд 3000 хүнийг хөлслөн ажиллуулж байгаа талаар “The Voice of America” мэдээлжээ.

Тус компанийн захирал Марк Цукерберг “Бусдад муу үлгэр дууриалал үзүүлэх дүрс бичлэгүүдийг “Фэйсбүүк”-ээр шууд цацаж байгаа нь үнэхээр харамсалтай байна" гэж мэдэгдсэн байна. Мөн тэрээр “Бид асуудал дагуулж буй дүрс бичлэгүүдийг шуурхай илрүүлэн устгахын тулд 3000 хүнийг хөлслөн ажиллуулж байна” гэжээ.

Дээрх 3000 хүн “Фэйсбүүк”-т одоо ажиллаж буй 4500 ажилтантай хамтран бусдад сөргөөр нөлөөлөх агуулга бүхий бичлэгүүдийг шуурхай илрүүлэн устгах ажлыг гүйцэтгэнэ. Өнгөрсөн сард нэгэн этгээд хүний амь хөнөөж буйгаа “Фэйсбүүк”-ээр шууд цацсан билээ. Түүний дараахан нэгэн тайланд эмэгтэй охиноо хөнөөж, амиа хорлож байгаагаа “Фэйсбүүк”-ээр шууд цацсан юм.