Дэлгэрхангай сумын Номгон багийн мянгат малчид хуримтлалын сан бүрдүүлдэг байна. Энэ жил энэ сангийнхаа хөрөнгөөр мал угаалгы банн хийхээр болсон гэж багийн Засаг дарга Ц. Даваа хэллээ.

Ирэх зун Дундговь аймгийн мал аж ахуйн салбарт хийх томоохон нэг ажил бол мал угаалга юм.Ингэхдээ стандартын дагуу бэлдсэн уусмалд малыг бүх биеэр нь шумбуулж угаах нь илүү үр дүнтэй гэж үзэж байгаа. Мал угаалгад зориулан сумд малын банн бэлдэх бөгөөд Дэлгэрхангай сумын Номгон багийн малчдын хувьд хуримтлалын сангаасаа ийнхүү хөрөнгө зарцуулахаар болжээ.

Өнгөрсөн жил тус багийн малчид мөн хөрөнгө босгон мал угаалгын худаг гаргаж бэлдсэн юм байна.

Дэлгэрхангай сум 146 мянга илүү мал өнгөрсөн оны эцэст тоолуулсан. Үүний 15 орчим хувь нь Номгон багт тоологджээ.

Эх Сурвалж: Монцамэ агентлаг